aisa nahin duaon men manga nahin tujhe
qismat men hi nahin tha jo paaya nahin tujhe
dil to aqidaton ki hadon se guzar gaya
vo to ḳhuda ka ḳhauf tha puuja nahin tujhe
sab muntazir the meri nigahen kidhar uThen
main ne bhi ehtiyat men dekha nahin tujhe
shayad palaT ke dekh le tu hi meri taraf
main ne isi umiid pe roka nahin tujhe
tere ḳhayal saath the mere qadam qadam
main to kisi qadam pe bhi bhula nahin tujhe
andesha-e-juda.i ke Dar men jiya huun main
ye mat samajh ke TuuT ke chaha nahin tujhe
vo pal haram ho gaya ‘mashkur’ ke liye
jis pal tasavvurat men paaya nahin tujhe
Leave a Reply