Bedam Shah Warsi
kuchh lagi dil ki bujha luun to chale jaiyega
khair siine se laga luun to chale jaiyega
main za-khud rafta hua sunte hi jaane ki khabar
pahle main aap men aa luun to chale jaiyega
rasta ghere hain arman-o-qalaq hasrat-o-yas
main zara bhiid hata luun to chale jaiyega
pyaar kar luun rukh-e-raushan ki balaen le luun
qadam ankhon se laga luun to chale jaiyega
mere hone hi ne ye roz-e-siyah dikhlaya
apni hasti ko mita luun to chale jaiyega
chhod kar zinda mujhe aap kahan jaenge
pahle main jaan se ja luun to chale jaiyega
aap ke jaate hi ‘bedam’ ki sunega phir kaun
apni biiti main suna to chale jaiyega
Leave a Reply