jo iḳhtilaf nahin hai to e’tiraf to ho
hai iḳhtilaf to kuchh vaj.h-e-iḳhtilaf to ho
dilon men kya hai kuchh is ka ata-pata to chale
ki baat jaisi ho jo bhi ho saaf saaf to ho
kuchh us se rabt-o-ta.alluq ka silsila to lage
nahin hai vo jo muafiq na ho ḳhilaf to ho
nahin bura.i miTane ki gar hamen taufiq
kam-az-kam us se tanaffur to inhiraf to ho
nahin sa.adat-e-sajda agar muqaddar men
ḳhulus se dar-e-ma.abud ka tavaf to ho
vo ahl-e-naqd-o-basirat hain ḳhair honge bhi
durust pahle magar un ka shin-qaf to ho
na hon jo sher haqa.eq ke tarjuman ‘rahi’
haqiqaton ka magar un se inkishaf to ho
Leave a Reply