Shamim Karhani
chaman chaman jo ye sub.h-e-bahar ki zau hai
tire tabassum-e-rangin ka ek partav hai
ḳhizan ki raat ke qatil kahan ga.e dekhen
ki jo lahu hai charagh-e-bahar ki lau hai
chale na saath zamana to is ko yuun kahiye
Thahar gaya hai musafir ki jada-e-nau hai
bujha hai dil to na samjho ki bujh gaya gham bhi
ki ab charagh ke badle charagh ki lau hai
miri zamin pe jabin-e-araq-araq ke siva
na qatra-e-mai-e-rangin na dana-e-jau hai
saval vaqt ki parchha.iyon se ham bhi karen
hamare dil men bhi halka sa ek partav hai
kaTe jo tirgi-e-sham-e-gham to kaise ‘shamim’
ḳhafa ḳhafa si kisi ke ḳhayal ki zau hai
Leave a Reply