tumhen paane ki chahat hai magar khone ka Dar bhi hai
ki dil shahr-e-tamanna hai to mahrumi ka ghar bhi hai
vafa ke baagh men jhule paḌe hain arzuon ke
duaon ki hari belon pe ḳhvahish ka samar bhi hai
fasil-e-fikr pe yadon ki qindilen bhi zau-afshan
tumhari muntazir main hi nahin ye chashm-e-tar bhi hai
masafat na-ummidi ki paḌi hai paanv men mere
tumhari ham-rahi bhi hai magar tanha safar bhi hai
chamakti kanch jaisi dhaḌkanon ko toḌne vaala
vo patthar dil bahut maana hua ik shishagar bhi hai
suno tum kah rahe the naan dua men maang lo mujh ko
magar tum soch lo meri duaon men asar bhi hai
hamari ek ḳhami hai tumhari zaat men khona
tumhen tum se chura lena hamara ik hunar bhi hai
suno us chand se kahna mere angan men bhi utre
saḌak ke paar kachche raste par mera ghar bhi hai
‘kanval’ e.azaz bhi kahti hai is ko jurm bhi duniya
ki badnam-e-zamana bhi mohabbat mo’atabar bhi hai
Leave a Reply