har ek samt jab us ko pukarna Thahra
vo phir miri rag-e-jan se qarib kya Thahra
fareb-ḳhurda nazar ko fareb duun kab tak
vo ek abr tha kya aaya aur kya Thahra
jidhar se ja.iye raste udhar hi jaate the
magar vahan se nikalna to mo.ajiza Thahra
vo sail tha ki musafir adam ki raah ga.e
jahaz duur magar ḳhushkiyon pe ja Thahra
jo din ko haath na aaya sarab ki surat
vo shab samet mire kunj-e-gham men aa Thahra
mata-e-jan hai jo us ek ḳhvab ka hasil
sulagti aankh men neze ka za.iqa Thahra
ab us ke shahr pe ‘shahin’ har safar hai tamam
ajiib ham-safari ka mo.amla Thahra
Leave a Reply