zamin-e-ishq-o-vafa pe uḌti hikayaten bhi na.i nahin hain
lahu ki gardish men raqs karti rifaqaten bhi na.i nahin hain
mohabbaton ke ye faisle to ḳhuda-e-bartar ne likh rakhe hain
kahan talak ham bacha.en daman ye chahaten bhi na.i nahin hain
agarche dekhe hain zulf-o-lab ke hasin sapne to kya ghalat hai
nazar ke kheton men ḳhvab bone ki hasraten bhi na.i nahin hain
bahar aate hi yuun laga ki chaman darida-dahan hua hai
gulab-rut men chaman pe nazil ye afaten bhi na.i nahin hain
pata nahin kyuun vo ḳhush bahut hai fuzul masnad-nashin ho kar
sagan-e-masnad ki fatehana himaqaten bhi na.i nahin hain
jhuki nazar se kalam kar ke asiir kar le vo ashiqon ko
nazar nazar men nazar churane ki adaten bhi na.i nahin hain
sanam ki ik ik ada pe ‘zakir’ na.i ghazal ki hai kya zarurat
shararten bhi na.i nahin hain nazakaten bhi na.i nahin hain
Leave a Reply