chand gile bhula diye chand se darguzar kiya
qissa-e-gham tavil tha jaan ke muḳhtasar kiya
jhuuT nahin tha ishq bhi ziist bhi thi tujhe aziiz
main ne bhi apni umr ko apne liye basar kiya
jaise bhi tere ḳhvab hon jo bhi tire sarab hon
main ne to ret oḌh li main ne to kam safar kiya
teri nigah-e-naz ka lutf-o-gurez ek saath
shauq tha kuchh agar raha ranj tha kuchh agar kiya
TuuT ke phir se juḌ gaya ḳhvab ka zard silsila
main ne tire firaq ko niind men hi basar kiya
raah bahut tavil thi raah men ik fasil thi
is ko bhi muḳhtasar kiya us men bhi ek dar kiya
ham to ajiib log the ham ko hazar rog the
ḳhuub kiya jo aap ne ghair ko ham-safar kiya
Leave a Reply