jab ki saari ka.enat us ki nigahbani men hai
dil azal hi se na jaane kaisi hairani men hai
meri fitrat bhi to shamil meri nadani men hai
laghzish-e-adam jo pinhan ḳhun-e-insani men hai
jaane kis hangam men Daali ga.i buniyad-e-dil
dil jo ab tak mubtala ranj-o-pareshani men hai
duur kar deta hai bas ik pal men sab shikve-gile
ye karishma bhi kisi ki aankh ke paani men hai
kya samajh pa.enge ye ahl-e-ḳhirad is raaz ko
lutf dana.i men kab vo hai jo nadani men hai
dil men aata hai hisar-e-har-talab ko toḌ duun
aisi ḳhvahish bhi tamannaon ki tughyani men hai
ho ga.i aadam se ye kaisi ḳhata jis ke evaz
nasl-e-adam aaj tak aisi pashemani men hai
koi surat jab na ban paa.i to rona aa gaya
kuchh to taskin-e-gham-e-dil ashk-afshani men hai
gar mile ḳhud men samo len saare insanon ka dard
is qadar vus.at hamari tang-damani men hai
Leave a Reply