tujh se TuuTa rabt to phir aur kya rah ja.ega
intishar-e-zat ka ik silsila rah ja.ega
qurbaten miT ja.engi aur fasla rah ja.ega
chand yadon ke siva bas aur kya rah ja.ega
ye taghaful ek din ik saneha ban ja.ega
aks to kho ja.ega aur aa.ina rah ja.ega
vaqt men lamha sa main tahlil hota ja.unga
ḳhali ankhon se ye manzar dekhta rah ja.ega
ek sha.ir ik hasin se sher ki ḳhatir miTa
vaqt ki tahvil men ye vaqi.a rah ja.ega
sard-mehri ke kohar men us ka chehra kya mile
in dhundlakon men use tu DhunDhta rah ja.ega
ek saaya narm-o-nazuk chhoḌ kar jo chal diya
sar pe suraj ik musafir rasta rah ja.ega
Leave a Reply