Siyasi Rah Mein Andesha-E-Laghzish Bahut Hai

siyāsī raah meñ andesha-e-laġhzish bahut hai

tujhe barbād karne ko tirī ḳhvāhish bahut hai

adā-kārī riyā-kārī fareb-o-makr sīkho

siyāsat meñ inhīñ ausāf se pursish bahut hai

ye dillī hai dalāloñ kī yahāñ sab kaam hoñge

tumhārī jeb ho bhārī to āsā.ish bahut hai

kabhī jo pūchh lete ho hamārā haal ham se

tumhāre dil meñ ye thoḌī sī gunjā.ish bahut hai

kahūñ kuchh sher aise jo utar jaa.eñ diloñ meñ

mire maulā mujhe itnī tirī baḳhshish bahut hai

Leave a Comment