Pritpal Singh Betab
zabton ki aur qadron ki ravani dekhna
phir hava men char-su ik bad-gumani dekhna
lamha lamha phailta hi ja raha hai char-su
shahr men jangal ki ik din be-karani dekhna
chahta hai vo mujhe ḳhush dekhna har haal men
chhin lega mujh se meri nauha-ḳhvani dekhna
aane vaali aur abhi raten hain tarik-o-muhib
aur utrengi bala.en asmani dekhna
dhuup niklegi to bah niklenge phir se abshar
barf dohra.egi phir apni kahani dekhna
apna ghar ham ne basaya hai lab-e-dariya to phir
bam-o-dar tak aa.ega ik roz paani dekhna
a.enge ‘betab’ mausam phir chanaron par na.e
la.enge rangon ki ik taaza kahani dekhna
Leave a Reply