kisi ki chashm-e-sada yaad aa.i
harif-e-jam-o-bada yaad aa.i
hui har afiyat madfun jis men
vo divar-e-fatada yaad aa.i
savad-e-dair-o-ka.aba men pahunch kar
tiri mahfil ziyada yaad aa.i
kisi ko be-tamanna bhuul baiThe
kisi ki be-irada yaad aa.i
zamane se hua dil tang jab bhi
vo aghosh-e-kushada yaad aa.i
kabhi tujh ko bhi ai sohbat faramosh
bahar-e-jan-dada yaad aa.i
jo manzil chhoḌ kar aa.e hain ‘shaukat’
vahi jada-ba-jada yaad aa.i
Leave a Reply