Obaidur Rahman
mas.ale mere sabhi hal kar de
varna yarab mujhe pagal kar de
vaqt ki dhuup men jalta hai badan
mujh pe saaya koi anchal kar de
aisi tahzib se hasil kya hai
jo bhare shahr ko jangal kar de
rok rakkhi hai ghaTa ankhon men
varna bah jaa.e to jal-thal kar de
vo jo rakhta hai mujhe nazron men
kahin nazron se na ojhal kar de
shahr men jaadu hai jaane kaisa
zar-e-ḳhalis ko jo pital kar de
gham hai saughat ki surat yarab
tu mire gham ko musalsal kar de
Leave a Reply