rah kar bhi tujh se duur tire as-pas huun
hijran men jal rahi huun main jaise kapas huun
qabza kiya hai kis ne ye mere shu.ur par
ik umr ho ga.i hai mujhe bad-havas huun
duniya na dekh pa.egi tera koi bhi aib
mujh ko pahan ke dekh main tera libas huun
jis se mira sukun bhi dekha nahin gaya
da.ava vo kar raha hai tira gham-shanas huun
main muskura ke baat to karti huun ai ‘siya’
ab kis ko main bata.un ki kitni udaas huun
Leave a Reply