Hajra Noor Zaryab
uTThe kahin se dard-e-jigar tum ko is se kya
lete nahin ho meri ḳhabar tum ko is se kya
do hi qadam chali thi paḌe chhale paanv men
gham se hai chuur zauq-e-safar tum ko is se kya
halat ne hansi mire honTon se chhin li
roti huun ab main sham-o-sahar tum ko is se kya
kaghaz ka phuul chhu luun to vo bhi mahak uThe
dekho na tum jo dast-e-hunar tum ko is se kya
dekho na mujh ko hans ke zamana ḳharab hai
rusva.i ka hai mujh ko bhi Dar tum ko is se kya
manzil pukarti hai chale aao jald tum
hai unchi nichi tirchhi Dagar tum ko is se kya
‘zaryab’ se ye tum ne kaha chahta huun main
patthar si ho ga.i hai nazar tum ko is se kya
Leave a Reply