Afzal Ahmad Syed
koi na harf-e-naved-o-khabar kaha us ne
vahi fasana-e-ashufta-tar kaha us ne
shirakat-e-khas-o-shola hai karobar-e-junun
ziyan-kade men kis anjam par kaha us ne
use bhi naz-e-ghalat-karda-e-taghaful tha
ki khvab o khema-faroshi ko ghar kaha us ne
tamam log jise asman kahte hain
agar kaha to use baal o par kaha us ne
use ajab tha ghurur-e-shaguft-e-rukhsari
bahar-e-gul ko bahut be-hunar kaha us ne
ye gul hain aur ye sitare hain aur ye main huun
bas ek din mujhe talim kar kaha us ne
miri misal thi saffaki-e-tamanna men
supurdagi men mujhe qatl kar kaha us ne
main aftab-e-qayamat tha so tulu hua
hazar matla-e-na-saz-tar kaha us ne
Leave a Reply