Nazeer Baaqri
ye hain tairak magar haal ye in ke dekhe
gharq hote hue tufan men tinke dekhe
chhin lete hain jo insan se ehsas-e-nazar
vo andhere kisi shab ke nahin din ke dekhe
aa gaya yaad unhen apne kisi gham ka hisab
hansne valon ne mire ashk jo gin ke dekhe
vo ajab shaan ka ghar hai ki jahan par sab log
ek hi shakl ke aur ek hi sin ke dekhe
ye ghalat hai ki rida le ke sitamgaron ne
un ke munh dekh liye paanv na jin ke dekhe
Leave a Reply