ham ne paa.i lazzat-e-didar lekin duur se
un ki surat dekh li sau baar lekin duur se
vo dikhate hain hamen ruḳhsar lekin duur se
is ka matlab hai ki kar lo pyaar lekin duur se
us ne jancha mera dard-e-dil magar aaya na paas
us ne dekha mera hal-e-zar lekin duur se
rauzan-e-divar se hasrat bhari ankhen laḌin
ho ga.iin un se nigahen chaar lekin duur se
us ne aane ka kiya hai qaul lekin ta-ba-dar
us ne milne ka kiya iqrar lekin duur se
paas ‘muztar’ kis tarah jaate hujum-e-yas men
ho gaya un ka hamen didar lekin duur se
Leave a Reply