Bedam Shah Warsi

Kash Meri Jabin-e-Shauq Sajdon Se Sarfaraaz Ho

kaash miri jabin-e-shauq sajdon se sarfaraz ho

yaar ki khak-e-astan taj-e-sar-e-niyaz ho

ham ko bhi paemal kar umr tiri daraz ho

mast-e-khiram-e-naz idhar mashq-e-khiram-e-naz ho

chashm-e-haqiqat-e-ashna dekhe jo husn ki kitab

daftar-e-sad-hadis-e-raz har varaq-e-majaz ho

samne ru-e-yar ho sajde men ho sar-e-niyaz

yunhi harim-e-naz men athon pahar namaz ho

us ke harim-e-naz men aql-o-khirad ko dakhl kya

jis ki gali ki khaak ka zarra jahan-e-raz ho

teri gali men pa ke ja jaae kahan tira gada

kyuun na vo be-niyaz ho tujh se jise niyaz ho

‘bedam’-e-khasta hijr men ban gai jan-e-zar par

jis ne diya hai dard-e-dil kaash vo charasaz ho

More Poems

Leave a Comment