ye muskurate tamam saa.e hue para.e to kya karoge
hava ne jab bhi mire badan ke diye bujha.e to kya karoge
tumhari ḳhvahish pe umr bhar ki juda.iyan bhi qubul kar luun
magar batao baghair mere jo rah na paa.e to kya karoge
vo jin men mere azaab tere sarab ubhre ya ḳhvab Duube
vo saare lamhe tumhari janib palaT ke aa.e to kya karoge
baghair dar ke kisi bhi ghar men ghire hue ho ye farz kar lo
aur aise aalam men mil sake na jo meri raa.e to kya karoge
abhi to mere ghilaf hathon men mutma.in hain pe ba.ad mere
jo andhiyon men charagh apne ye tharthara.e to kya karoge
tumhari ankhon men aks mera agar na hoga to kaisa hoga
sama.aton ke shajar pe panchhi na chahchaha.e to kya karoge
karoge kya jo mire badan se dhuen ki ik din lakir uTThi
lakir se phir hazar chehre nikal ke aa.e to kya karoge
vo jin ḳhayalon men rah ke tum se miri bhi pahchan kho ga.i hai
unhi ḳhayalon ke sab musafir hue para.e to kya karoge
ye sochte ho chala gaya vo to chhat pe jaoge kis liye tum
ki ab ke savan ki barishon men jo sab naha.e to kya karoge
hain dastaras men abhi bhi ‘tahir’ uTha ke ab is ko pi bhi Daalo
mushahidon men hi ho ga.i gar ye ThanDi chaa.e to kya karoge
Leave a Reply