Shuja Khaavar
halat use dil ki na dikha.i na zaban ki
ḳhair us ne na ki baat to ham ne bhi kahan ki
pahle to hansa zor se phir ah-o-fughan ki
masti men qalandar ne baḌi duur ki haan ki
allah ka banda koi ghar se nahin nikla
tafsir sabhi karte rahe kaun-o-makan ki
ek us ka sarapa hai ki bas men nahin aata
kya ho ga.i halat mire andaz-e-bayan ki
ek ek sitamgar ko tasavvur men bula kar
shamshir-e-zaban ham ne bhi kal ḳhuub ravan ki
tufan-e-ma.ani mire har lafz ke pichhe
tezi hai har ik sher men dilli ki zaban ki
sahra-e-adam ka bhi ‘shuja’ ḳhuub maza hai
tum sochte rahte ho faqat gulshan-e-jan ki
Leave a Reply