Main Soz-e-darun Apna dikha Bhi Nahin Sakta

Ahmad Ali Barqi Azmi

main soz-e-darun apna dikha bhi nahin sakta

kya mujh pe guzarti hai bata bhi nahin sakta

raushan hai isi se mira kashana-e-hasti

is sham-e-mohabbat ko bujha bhi nahin sakta

hai bar-e-samaat use iz.har-e-tamanna

ye hal-e-zabun us ko suna bhi nahin sakta

zinda hai zamir apna abhi, samne us ke

apna sar-e-taslim jhuka bhi nahin sakta

had hoti hai ik naaz uthane ki kisi ke

ye bar-e-garan ab main utha bhi nahin sakta

is haal men kab tak yunhi ghut ghut ke jiyunga

rutha hai vo aise ki mana bhi nahin sakta

tha ghair jise apna samajhta tha bahi-khvah

ab mahfil-e-yaran vo saja bhi nahin sakta

nafiz hai zaban-bandi ka dastur abhi tak

kya dil pe guzarti hai bata bhi nahin sakta

har vaqt tasavvur men hai jo azmat-e-rafta

khoya hua eazaz vo pa bhi nahin sakta

khvabon men hasin taj-mahal karta hai taamir

apne liye ik ghar jo bana bhi nahin sakta

kyuun niind udata hai vo ‘barqi’ ki ab us se

vo vada-e-farda jo nibha bhi nahin sakta