Ram Awtar Gupta Muztar
ye zaḳhm zaḳhm badan aur nam fazaon men
bhaTak raha huun liye iztirab paanv men
ye be-lihaz nigahen ye ajnabi chehre
panap raha hai koi shahr jaise gaanv men
bacha ke maut se insan ḳhud ko rakh leta
jo ghunghru hote kahin hadson ke paanv men
ye ek roz hamara vajud Das lega
ugal rahe hain jo ye zahr ham havaon men
har ek pal mare ham phir bhi zindagi chahi
ghazab kashish rahi kam-baḳht ki adaon men
vo ghar bana ke baharon ka lutf lete hain
jo tinka tinka jama.a karte hain ḳhizaon men
Leave a Reply