Faiz Ahmad Faiz

Aae Kuchh Abr Kuchh Sharab Aae

aae kuchh abr kuchh sharab aae

is ke baad aae jo azaab aae

bam-e-mina se mahtab utre

dast-e-saqi men aftab aae

har rag-e-khun men phir charaghan ho

samne phir vo be-naqab aae

umr ke har varaq pe dil ki nazar

teri mehr-o-vafa ke baab aae

kar raha tha gham-e-jahan ka hisab

aaj tum yaad be-hisab aae

na gai tere gham ki sardari

dil men yuun roz inqalab aae

jal uthe bazm-e-ghair ke dar-o-bam

jab bhi ham khanuman-kharab aae

is tarah apni khamushi gunji

goya har samt se javab aae

‘faiz’ thi raah sar-ba-sar manzil

ham jahan pahunche kamyab aae

Leave a Comment