Ba-Har-Surat Mohabbat Ka Yahi Anjam Dekha Hai

Poet

ba-har-surat mohabbat ka yahi anjam dekha hai

ki jaan de kar bhi insan ko yahan nakam dekha hai

jahan pahunchi hain parde chaak kar ke ishq ki nazren

kahan tu ne vo manzar ai nigah-e-am dekha hai

nigah-e-yar ko barham kiya hai main ne ḳhud akasr

kabhi jo dard ko dil ke zara aram dekha hai

labon tak mere baḌh ke ḳhud hi aa pahuncha hai ai saaqi

nazar bhar kar kabhi main ne jo su-e-jam dekha hai

kiya hai munkir-o-sarkash ko bhi sairab duniya men

tire abr-e-karam ne kis ko tishna-kam dekha hai

dil-o-jan kar diye nazr-e-nigah-e-naz bas main ne

na kuchh aghaz dekha hai na kuchh anjam dekha hai

mariz-e-gham ki halat dekhne vaale ye kahte hain

ki be-hoshi men bhi lab par tumhara naam dekha hai

ye apni muḳhtasar hai ‘ashk’ rudad-e-rah-e-ulfat

ki bas nakamiyon ko saath har har gaam dekha hai