Krishn Bihari Noor
bas ek vaqt ka ḳhanjar miri talash men hai
jo roz bhes badal kar miri talash men hai
ye aur baat ki pahchanta nahin hai mujhe
suna hai ek sitamgar miri talash men hai
adhure ḳhvabon se ukta ke jis ko chhoḌ diya
shikan-nasib vo bistar miri talash men hai
ye mere ghar ki udasi hai aur kuchh bhi nahin
diya jala.e jo dar par miri talash men hai
aziiz huun main mujhe kis qadar ki har ik gham
tiri nigah bacha kar miri talash men hai
main ek qatra huun mera alag vajud to hai
hua kare jo samundar miri talash men hai
vo ek saaya hai apna ho ya paraya ho
janam janam se barabar miri talash men hai
main devta ki tarah qaid apne mandir men
vo mere jism se bahar meri talash men hai
main jis ke haath men ik phuul de ke aaya tha
usi ke haath ka patthar meri talash men hai
vo jis ḳhulus ki shiddat ne maar Daala ‘nur’
vahi ḳhulus muqarrar miri talash men hai
Leave a Reply