Sultan Rashk
likh raha huun harf-e-haq harf-e-vafa kis ke liye
mangta huun zinda rahne ki dua kis ke liye
phuul hain sab ek gulshan ke to phir taḳhsis kyuun
sehn-e-gulshan men ye zahrili hua kis ke liye
main to nakam mohabbat huun chalo rusva hua
tau bata hai tera paiman-e-vafa kis ke liye
main to ik ḳhvahish ki bhi takmil par qadir nahin
ye shikva ḳhusravana ye ana kis ke liye
mujh ko ḳhush-fahmi nahin hai ai hava phir bhi bata
muztarib hai vo taghaful ashna kis ke liye
kho chuka hai us ko jab to ḳhud hi ai sultan-‘rashk’
ab dhaḌakta hai dil-e-be-mudda.a kis ke liye
Leave a Reply