chaman hai kaisa ye kaisi bahar hai saaqi
lahu se sehn-e-chaman lala-zar hai saaqi
ye chira-dasti-e-ahl-e-junun ma.az-allah
qaba-e-lala-o-gul taar taar hai saaqi
hai zad men atish-o-ahan ki shahr-e-ramish-o-rang
udaas shaam sahar sogvar hai saaqi
ye zaḳhm zaḳhm badan aur ye soḳhta lashen
ajiib marhala-e-gir-o-dar hai saaqi
ye kya sitam hai ki qatil hai suraḳh-ru lekin
hua jo qatl vahi sharmsar hai saaqi
na jaane mausam-e-gul ka shabab kya hoga
agar ye amad-e-fasl-e-bahar hai saaqi
baja ki vaqt taghayyur-pazir hai har dam
magar hayat ka kab e’tibar hai saaqi
Leave a Reply