hijr o visal ki sardi garmi sahta hai
dil darvesh hai phir bhi raazi rahta hai
phuul se itna rabt baḌhana Thiik nahin
qatra-e-shabnam uḌte uḌte kahta hai
is kuTiya ko Dhane vaale ghaur se sun
is kuTiya men tera dhyan bhi rahta hai
har aansu men atish ki amezish hai
dil men shayad aag ka dariya bahta hai
mujh se bichhaḌ kar pahron roya karta tha
vo jo mere haal pe hansta rahta hai
dil ko shayad fasl-e-baharan raas nahin
baagh men rah kar ḳhushbu ke dukh sahta hai
main ne us ko apna masiha maan liya
saara zamana jis ko qatil kahta hai
taara taara hijr ke qissa phaile hain
aansu aansu dil ka sagar bahta hai
un honTon se yuun risti hai baat ‘zahir’
jaise ik naghmon ka jharna bahta hai
Leave a Reply