Kitni Zulfen uDin Kitne Aanchal uDe Chand Ko Kya KHabar

Wasi Shah

kitni zulfen uḌiin kitne anchal uḌe chand ko kya ḳhabar

kitna matam hua kitne aansu bahe chand ko kya ḳhabar

muddaton us ki ḳhvahish se chalte rahe haath aata nahin

chaah men us ki pairon men hain aable chand ko kya ḳhabar

vo jo nikla nahin to bhaTakte rahe hain musafir ka.i

aur luTte rahe hain ka.i qafile chand ko kya ḳhabar

us ko da.ava bahut miThe-pan ka ‘vasi’ chandni se kaho

us ki kirnon se kitne hi ghar jal ga.e chand ko kya ḳhabar