Nai Zindagi Ki Hawa Chali to Kai Naqab Utar Gae

Poet

na.i zindagi ki hava chali to ka.i naqab utar ga.e

jinhen inqalab se pyaar tha vahi inqalab se Dar ga.e

mujhe rahbaron se hai ye gila ki unhen shu.ur-e-safar na tha

kabhi raston men ulajh ga.e kabhi manzilon se guzar ga.e

tujhe marg-e-nau ki talash hai magar irtiqa ka pata nahin

koi ek shakl jo miT ga.i to hazar naqsh ubhar ga.e

jise justuju-e-sukun rahi use sahilon ne Dubo diya

unhen koi mauj na chhu saki jo taḌap ke paar utar ga.e

gham-e-ishq ne gham-e-ka.enat men ek ruuh si phunk di

mire raag aur sanvar ga.e mire giit aur nikhar ga.e