Azad Gulati
bahut lamba safar tapti sulagti ḳhvahishon ka tha
magar saaya hamare sar pe guzri sa.aton ka tha
saron pe haath apne ghar ki bosida chhaton ka tha
magar mahfuz sa manzar hamare anganon ka tha
kisi bhi sidhe raste ka safar milta use kyun-kar
ki vo masdud ḳhud apne bana.e da.eron ka tha
kabhi hanste hue aansu kabhi roti hui ḳhushiyan
karishma jo bhi tha saara hamari hi hison ka tha
ḳhud apni kavishon se ham ne apni qismaten likkhin
magar kuchh haath in men bhi hamare dushmanon ka tha
na.e rishte muqaddas ḳhvab se avaz dete the
magar aaseb sa dil par guzishta rabton ka tha
kise milti najat ‘azad’ hasti ke masa.il se
ki har koi muqayyad ab-o-gil ke silsilon ka tha
Leave a Reply