Yun Aane Wale Akele-Pan Ke Liye Main Yaaden Bana Raha Hun

yuuñ aane vaale akele-pan ke liye maiñ yādeñ banā rahā huuñ

ki us ke nazdīk baiTh kar kuchh fuzūl bāteñ banā rahā huuñ

udaas mausam udaas jhūle udaas phirte haiñ sab parinde

so un kī ḳhātir maiñ bāzuoñ se shajar meñ shāḳheñ banā rahā huuñ

maiñ jāntā huuñ vo ḳhud-ġharaz hai par is tabī.at kā koī hal hai

vo mere din ḳhaak kar rahā hai maiñ us kī rāteñ banā rahā huuñ

mujhe ḳhud apne badan se kirneñ nikaltī mahsūs ho rahī haiñ

maiñ canvas par hasīn laḌkī kī shoḳh āñkheñ banā rahā huuñ

kamān aabrū siyāh palkeñ gulāb aariz ġhazāl āñkheñ

hai jin se vābasta ishq merā vo saarī yādeñ banā rahā huuñ

Leave a Comment