Ahmad Zafar
us ne toda jahan koi paiman
marhale aur ho gae asan
miir hai koi koi hai sultan
sochta huun kahan gaya insan
andhiyon men jala rahe the charagh
haae vo log be-sar-o-saman
falsafi falsafon men duub gae
aadmi ka lahu raha arzan
abr ban kar baras hi jaega
khet se jab utha gham-e-dahqan
shoala-e-gul hai zakhm-e-dil ki tarah
ye chaman men bahar hai ki khizan
sina-e-sang men bhi phuul khile
gham jahan bhi hua gham-e-pinhan
dil ki azurdagi na puchh ‘zafar’
baat mere liye hai sang-e-giran
Leave a Reply