Asar Lakhnavi
bhule afsane vafa ke yaad dilvate hue
tum to aa.e aur dil ki aag bhaḌkate hue
mauj-e-mai bal kha ga.i gul ko jama.i aa ga.i
zulf ko dekha jo us aariz pe lahrate hue
be-muravvat yaad kar le ab to muddat ho ga.i
teri baton se dil-e-muztar ko bahlate hue
niind se uTh kar kisi ne is tarah ankhen malin
sub.h ke taare ko dekha aankh jhapkate hue
ham to uTThe jaate hain lekin bata de is qadar
kis ke dar ki ḳhaak chhane tere kahlate hue
jhaaḌ kar daman ‘asar’ jis bazm se uTh aa.e the
aaj phir dekhe ga.e hazrat udhar jaate hue
Leave a Reply