Faza Ibn E Faizi
ghazal ke parde men be-parda ḳhvahishen likhna
na aaya ham ko barahana guzarishen likhna
tire jahan men huun be-saya abr ki surat
mire nasib men be-abr barishen likhna
hisab-e-dard to yuun sab miri nigah men hai
jo mujh pe ho na sakin vo navazishen likhna
ḳharashen chehre ki siine ke zaḳhm suukh chale
kahan hain naḳhun-e-yaran ki kavishen likhna
ham ek chaak hain jo kuza-gar ke haath men hai
hamara kaam zamane ki gardishen likhna
ba-rah-e-rast koi farz ada nahin hota
vahi sifarishen sunna sifarishen likhna
hua na ye bhi saliqe se zindagi karte
har ek saans ko nakam koshishen likhna
kahan vo log jo the har taraf se nastaliq
purani baat hui chust bandishen likhna
hunar-varo zara kuchh din ye turfagi bhi sahi
hamare lafzon ko ma.ani ki laghzishen likhna
kabhi jo ḳhat use likhna ‘faza’ to rakhna yaad
miri taraf se bhi kuchh nek ḳhvahishen likhna
Leave a Reply