Fauziya Rabab
guzarti hai jo dil par vo kahani yaad rakhta huun
main har gul-rang chehre ko zabani yaad rakhta huun
main aksar kho sa jaata huun gali-kuchon ke jangal men
magar phir bhi tire ghar ki nishani yaad rakhta huun
mujhe achchhe bure se koi nisbat hai to itni hai
ki har na-mehrban ki mehrbani yaad rakhta huun
kabhi jo zindagi ki be-sabati yaad aati hai
to sab kuchh bhuul jaata huun javani yaad rakhta huun
mujhe ma.alum hai kaise badal jaati hain tariḳhen
isi ḳhatir to main baten purani yaad rakhta huun
Leave a Reply