is tarah duniya men dil ko mahram-e-gham kijiye
jab ḳhushi koi mayassar ho to matam kijiye
ishq se phir silsila jumbani-e-gham kijiye
zindagi par maut ko pahle muqaddam kijiye
husn ki janib nigah-e-shauq ya kam kijiye
ya nigah-e-shauq ko ik ahd-e-mohkam kijiye
maut ka kya maut ka to sau tarah gham kijiye
zindagi nashad ka kis tarah matam kijiye
dekh kar ahl-e-tarab ka saz-o-saman-e-tarab
bad-nasibon ka zara andaza-e-gham kijiye
jaane kis aalam ki hasrat men hain nazren muztarib
varna kya nazzara-e-husn-e-do-alam kijiye
ab junun ki sarhadon se aa mila hai josh-e-ishq
kuchh samajh kar ab nigah-e-husn barham kijiye
ahl-e-ishrat apni bazm-e-aish-o-ishrat ke qarib
ehtiyatan mun.aqid ik bazm-e-matam kijiye
ansuon ka ponchhne vaala hi jab koi na ho
aah kis ummid par ankhon ko pur-nam kijiye
gham ko hone dijiye ho jis qadar manus dil
dil ko jitna ho sake begana-e-gham kijiye
phir qafas se lauT kar aa.e chaman men phir vahi
ashiyan ke vaste tinke faraham kijiye
hain nigahon ki hadon se duur abhi bebakiyan
shoḳh chitvan se ghurur-e-husn ko kam kijiye
ta-kuja avara-e-nazzara chashm-e-husn-e-dost
jam.a ik markaz pe kyuun kar husn-e-alam kijiye
har ḳhushi ne is natije par hamen pahuncha diya
jab ḳhushi koi mayassar ho to matam kijiye
aarzu se baḌh ke dushman koi insan ka nahin
jis qadar mumkin ho ‘bismil’ aarzu kam kijiye
Leave a Reply