Lauh-E-Mazar Dekh Ke Ji Dang Rah Gaya

Zaheer Kashmiri

lauh-e-mazar dekh ke ji dang rah gaya

har ek sar ke saath faqat sang rah gaya

badnam ho ke ishq men ham surḳh-ru hue

achchha hua ki naam gaya nang rah gaya

hoti na ham ko saya-e-divar ki talash

lekin muhit-e-zist bahut tang rah gaya

sirat na ho to ariz-o-ruḳhsar sab ghalat

ḳhushbu uḌi to phuul faqat rang rah gaya

apne gale men apni hi banhon ko Daliye

jiine ka ab to ek yahi Dhang rah gaya

kitne hi inqalab shikan-dar-shikan mile

aaj apni shakl dekh ke main dang rah gaya

taḳh.il ki hadon ka ta.ayyun na ho saka

lekin muhit-e-zist bahut tang rah gaya

kal ka.enat-e-fikr se azad ho ga.i

insan misal-e-dast-e-tah-e-sang rah gaya

ham un ki bazm-e-naz men yuun chup hue ‘zahir’

jis tarah ghuT ke saaz men ahang rah gaya