Poet
haq-nava jur.at-e-iz.har tak aa pahunche hain
hausle ab rasan-o-dar tak aa pahunche hain
shaiḳh sahab bhi hain saaqi tire maiḳhane men
teri jannat men gunahgar tak aa pahunche hain
dard-e-dil ka mire afsana hain vo do aansu
jo tire phuul se ruḳhsar tak aa pahunche hain
in bayanon se mira koi ta.alluq hi nahin
jo mire naam se aḳhbar tak aa pahunche hain
amn-e-alam ki dua ke liye jo uThte the
aaj vo haath bhi talvar tak aa pahunche hain
hal nikal aaya hai gumrahi-e-dil ka jab se
gham zamane ke gham-e-yar tak aa pahunche hain
dekhiye un ko chaman men nazar aa.e kya kya
‘shauq’ jo nargis-e-bimar tak aa pahunche hain
Leave a Reply