Shahbaz Khwaja
aise rakhti hai hamen teri mohabbat zinda
jis tarah jism ko sanson ki hararat zinda
shauq ki raah men ik aisa bhi pal aata hai
jis men ho jaati hai sadiyon ki riyazat zinda
roz ik ḳhauf ki avaz pe ham uThte hain
roz hoti hai dil o jaan men qayamat zinda
ab bhi anjan zaminon ki kashish khinchti hai
ab bhi shayad hai lahu men kahin hijrat zinda
ta.at-e-jabr bahut aam hui jaati thi
ek inkar ne ki rasm-e-baghavat zinda
ham to mar kar bhi na batil ko salami denge
kaise mumkin hai ki kar len tiri bai.at zinda
ham men soqrat to koi nahin phir bhi ‘shahbaz’
zahr pi lete hain rakhte hain rivayat zinda
Leave a Reply