Nisar Nasik
mujhe sambhal mira haath thaam kar le ja
thaka hua huun ka.i din ka mujh ko ghar le ja
giraft-e-gul se nikal kar bikharta jaata huun
mujhe hava ke paron men sameT kar le ja
jahan se maang mire naam par hayat ki bhiik
tu mera kasa-e-ehsas dar-ba-dar le ja
jahan-e-past ko phir dekhne ki ḳhvahish hai
shu.ur-e-gham mujhe gham ke pahaḌ par le ja
ab us se aage har ik moḌ par andhera hai
tu apne saath mire pyaar ki sahar le ja
tu jis ki raah men roya hai umr bhar ‘nasik’
vo sub.h raakh hui apni jholi bhar le ja
Leave a Reply