badal umDe hain dhuan-dhar ghaTa chha.i hai
dhuen tauba ke uḌane ko bahar aa.i hai
ta ki angur hare hon mire zaḳhm-e-dil ke
dhani angiya mire dildar ne rangva.i hai
tira-baḳhti se hui mujh ko ye ḳhiffat hasil
dil-e-vahshat men suvaida ki jagah paa.i hai
ye chalan hain to tumhen hashr se denge tashbih
log saffak kahenge baḌi rusva.i hai
maut ko ziist samajhta huun main betabi se
tiri furqat ne ye halat miri pahuncha.i hai
sabr hijran men kare ‘kaifi’-e-mahzun kab tak
aḳhir ai dost koi hadd-e-shakeba.i hai
Leave a Reply