Poet
mah-o-anjum kahkashan ke ashiyanon se pare
aḳhiri manzil hai meri asmanon se pare
aise aalam men haqiqat ka ho kaise inkishaf
vo abhi pahunche nahin hain dastanon se pare
ek tufan se dilon ki kashtiyan hain muntashir
ek tufan muntazir hai badbanon se pare
aap apni ambarin zulfen hava men khol den
ḳhushbuen to ja chuki hain gulistanon se pare
ḳhastagi se jin ki qaa.em hai mohabbat shahr men
kuchh makan aise bhi hain unche makanon se pare
nasl-e-adam ke sabhi afrad hain is men sharik
ye jahan ik ḳhandan hai ḳhandanon se pare
aao ham ‘asrar’ dekhen kya vahan hai ḳhaas moḌ
uTh rahi hai gard si kuchh karvanon se pare
Leave a Reply