Shamsa Najm
ye kya ek zehni aziyyat nahin hai
jo jazbat men tere shiddat nahin hai
abhi mujh se rakhte nahin rabta tum
abhi tum ko meri zarurat nahin hai
dikha.e mujhe pech-o-ḳham zindagi ne
chunun sahl rasta ye aadat nahin hai
koi ek insan to aisa dikha do
gunahon se jis ko ki raghbat nahin hai
kisi aur hasina pe aaya hai dil kya
jo pahli si tujh ko mohabbat nahin hai
kahan kab dhamake se marna hai ham ko
muayyan koi ab to muddat nahin hai
vo barbad karta hai logon ki duniya
zara aankh men par nadamat nahin hai
sarokar tum ko nahin hal-e-dil se
hamen bhi sunane ki hajat nahin hai
Leave a Reply