Meri Wafa Ka Tera Lutf Bhi Jawab Nahin

miri vafa ka tira lutf bhi javab nahin

mire shabab ki qimat tira shabab nahin

ye mahtab nahin hai ki aftab nahin

sabhi hai husn magar ishq ka javab nahin

miri nigah men jalve hain jalve hi jalve

yahan hijab nahin hai yahan naqab nahin

junun bhi had se siva shauq bhi hai had se siva

ye baat kya hai ki main maurid-e-itab nahin

yahan to husn ka dil bhi hai gham se sad paara

main kamyab nahin vo bhi kamyab nahin

yahan to raat ki bedariyan musallam hain

magar vahan bhi hasin ankhdiyon men khvab nahin

na puchhiye miri duniya ko meri duniya men

khud aftab bhi zarra hai aftab nahin

sab hi hain mai-kada-e-dahr men khirad vaale

koi kharab nahin hai koi kharab nahin

‘majaz’ kis ko main samjhaun koi kya samjhe

ki kamyab-e-mohabbat bhi kamyab nahin

Leave a Comment