phir tira shahr tiri rahguzar ho ki na ho
aur ho bhi to mujhe shauq-e-safar ho ki na ho
ho na ho phir se rag-o-pai men shararon ka guman
phir kabhi dosh pe mere tira sar ho ki na ho
maang luun tere havale se to shayad mil jaa.e
kya ḳhabar sirf duaon men asar ho ki na ho
na-umidi ke ye shab-zad Darate hain mujhe
tere aane se munavvar mira ghar ho ki na ho
mujh se bhula na gaya un ke labon ka vo khinchav
yaad un ko bhi mira dida-e-tar ho ki na ho
ab bhi aa jaao koi der khuli hain ankhen
kya ḳhabar phir kabhi divar men dar ho ki na ho
maan ke anchal ke tale baiTh lo kuchh der ai ‘taj’
kya ḳhabar aage ye saaya ye shajar ho ki na ho
Leave a Reply