Poet
noch liye har shaḳh se patte buuTa buuTa luuT liya
dast-e-ḳhizan ne chori chori bagh-e-tamanna luuT liya
us ko ḳhud hi main ne apne shahr ki daulat saunpi thi
kis se zikr karun ab ja kar us ne kya kya luuT liya
aur to kuchh bhi paas nahin tha ik yadon ki daulat thi
zalim vaqt ne chupke chupke ye bhi asasa luuT liya
suukh ga.i hain dhuup men shaḳhen ummidon armanon ki
mausam-e-gham ne dil ke shajar ka patta pata luuT liya
apne dil ke armanon ka mela ek lagaya tha
us ne apni chhab dikhla kar saara mela luuT liya
har su bam-o-dar par chha.e dard-o-yas ke saa.e hain
kis zalim ne is nagri ka qarya qarya luuT liya
tujh ko bhi tha ‘shahid’-e-nadan apne dil par naaz bahut
us ne chor ban ke aḳhir rafta rafta luuT liya
Leave a Reply