Ali Ahmad Jalili
laa.i hai kis maqam pe ye zindagi mujhe
mahsus ho rahi hai ḳhud apni kami mujhe
dekho tum aaj mujh ko bujhate to ho magar
kal DhunDhti phiregi bahut raushni mujhe
tai kar raha huun main bhi ye rahen salib ki
avaz ai hayat na dena abhi mujhe
sukhe shajar ko phenk duun kaise nikal kar
deta raha hai saaya shajar jo kabhi mujhe
kyuun kar rahi hai mujh se savalat zindagi
kah do javab ki nahin fursat abhi mujhe
kya chahta tha vaqt pe likhna na puchhiye
hurmat qalam ki apni bachani paḌi mujhe
dil-dariyan bhi rah ga.iin parde men ai ‘ali’
lahja badal badal ke sada di ga.i mujhe
Leave a Reply