Lai Hai Kis Maqam Pe Ye Zindagi Mujhe

laa.ī hai kis maqām pe ye zindagī mujhe

mahsūs ho rahī hai ḳhud apnī kamī mujhe

dekho tum aaj mujh ko bujhāte to ho magar

kal DhūñDhtī phiregī bahut raushnī mujhe

tai kar rahā huuñ maiñ bhī ye rāheñ salīb kī

āvāz ai hayāt na denā abhī mujhe

sūkhe shajar ko pheñk duuñ kaise nikāl kar

detā rahā hai saaya shajar jo kabhī mujhe

kyuuñ kar rahī hai mujh se savālāt zindagī

kah do javāb kī nahīñ fursat abhī mujhe

kyā chāhtā thā vaqt pe likhnā na pūchhiye

hurmat qalam kī apnī bachānī paḌī mujhe

dil-dāriyāñ bhī rah ga.iiñ parde meñ ai ‘alī’

lahja badal badal ke sadā dī ga.ī mujhe

Leave a Comment